Prezident Naxçıvanın incəsənət xadimlərini təltif etdi - SƏRƏNCAM

Prezident İlham Əliyev mayın 7-də "İncəsənət xadimlərinə Azərbaycan Respublikası Prezidentinin mükafatlarının verilməsi haqqında" Sərəncam imzalayıb.

NUHÇIXAN İnformasiya Agentliyinin məlumatına görə, Prezident mükafatlarına layiq görülənlər arasında Naxçıvan Muxtar Respublikasının incəsənət xadimləri də vardır.

Prezidentin Sərəncamı ilə Alışova Şölə Qasım qızına, Babayeva Sevinc Məmmədəli qızına, Əliyeva Hüsniyyə Səfər qızına, Hümbətova Ülviyyə Cavanşir qızına, İsmayılov Samir Süleyman oğluna, Quliyev Nihat Heydər oğluna, Mahmudov Rövşən Oqtay oğluna, Məmmədov Nüsrət Cəfər oğluna, Məmmədov Sabir Duman oğluna və Sultanov Neymət İslam oğluna Prezident mükafatları verilib.

NUHÇIXAN İnformasiya Agentliyi

07.05.2021

 

Uşaq və gənclər arasında muxtar respublika rəqs müsabiqəsi keçirilib

Mayın 7-də Naxçıvan Dövlət Uşaq Teatrında uşaq və gənclər arasında rəqs müsabiqəsi keçirilmişdir. Müsabiqədə Naxçıvan Musiqi Kollecində, uşaq musiqi, incəsənət və bədii sənətkarlıq məktəblərində təhsil alan tələbə və şagirdlər, Naxçıvan Dövlət Uşaq Filarmoniyasının Mahnı və rəqs ansamblının üzvləri, klub müəssisələrinin dərnək üzvləri iştirak etmişdir.

Qeyd edək ki, Azərbaycan xalqı uzun əsrlər boyu rəngarəngliyi və coşqunluğu ilə insanı valeh edən rəqslər yaratmışdır. Xalqımızın xoreoqrafiyasında müxtəlif xarakterli saysız-hesabsız kişi və qadınların tək, qoşa, eləcə də dəstə ilə rəqs növləri yer almaqdadır. Bu mənəvi sərvət sadədən mürəkkəbə doğru uzun inkişaf mərhələsi keçmiş, təkmilləşərək günümüzədək professional rəqs növləri kimi gəlib çatmışdır. Qədim tarixə malik zəngin mədəniyyətimizin bir sahəsi olan rəqslərimizin yaranma tarixi minilliklərlə ölçülür. Bunu Nuh Peyğəmbərin torpaq üzərinə çıxdığı Gəmiqayadakı, həmçinin Qobustandakı qaya təsvirləri aydın şəkildə ifadə etməkdədir.

Mədəniyyətimizin bütün sahələri kimi, milli rəqslərimizin təbliği və yaşadılması istiqamətində muxtar respublikada müxtəlif mədəni tədbirlər həyata keçirilməkdədir. Peşəkar rəqs kollektivləri üçün milli geyim dəstlərinin alınması, onların maddi-texniki bazalarının yaxşılaşdırılması daim dövlətimizin diqqətində olan məsələlərdəndir.

Müsabiqənin keçirilməsində məqsəd muxtar respublikada rəqs sənətinin inkişaf etdirilməsi, gənc istedadların aşkara çıxarılması, onların ifaçılıq səviyyəsinin yüksəldilməsi və dəstəklənməsidir.

Qeyd edək ki, müsabiqədə 2 yaş qrupu - solo, duet və kollektiv nominasiyaları üzrə 50-yə yaxın uşaq və gənc iştirak etmişdir. Naxçıvan Muxtar Respublikası Mədəniyyət Nazirliyinin müvafiq əmri ilə təsdiq olunmuş muxtar respublikanın tanınmış incəsənət xadimlərindən ibarət olan Münsiflər Heyəti tərəfindən 10 ballıq sistem üzrə gizli səsvermə yolu ilə seçilmiş qaliblər yekun tədbirində mükafatlandırılacaqdır.

 

Naxçıvan Muxtar Respublikası Mədəniyyət

Nazirliyinin mətbuat xidməti

07.05.2021

 
 

“Bu, kino ki var...” adlı kinoviktorinanın muxtar respublika birinciliyi keçirilmişdir

Naxçıvan Muxtar Respublikası Mədəniyyət və Təhsil nazirliklərinin “Təhsil və mədəniyyət müəssisələrinin qarşılıqlı fəaliyyətinin səmərəli təşkili ilə bağlı 2020-2021-ci tədris ili üçün tədbirlər planı”na əsasən Naxçıvan Muxtar Respublikasının Təhsil Nazirliyinin və Naxçıvan Dövlət Film Fondunun birgə təşkilatçılığı ilə 2021-ci il 7 may tarixində “Bu, kino ki var...” adlı kinoviktorinanın muxtar respublika birinciliyi keçirilmişdir.

Naxçıvan Şəhər Gənclər Mərkəzində keçirilən birincilikdə Naxçıvan Muxtar Respublikasında fəaliyyət göstərən ümumtəhsil məktəblərinin 5-9-cu sinif şagirdlərindən ibarət 8 komanda iştirak etmişdir. Kinoviktorinanın keçirilməsində  məqsəd məktəblilərin kino biliyinin yoxlanması,  milli kinonun  təbliğidir.

Yarımfinal mərhələlərində ən yüksək bal toplayan 4 komanda - Ordubad, Şərur, Sədərək və Naxçıvan şəhərindəki 7 №-li tam orta məktəbin komandası finalda iştirak etmək hüququ qazanmışlar.

Finalda Naxçıvan şəhər 7 №-li tam orta məktəbin komandası I, Ordubad rayon komandası  II, Şərur rayon komandası isə III yerə layiq görülmüşlər.

Sonda qalib komandalara diplomlar təqdim olunmuşdur.

Naxçıvan Muxtar Respublikası Mədəniyyət

Nazirliyinin mətbuat xidməti

07.05.2021

 

 

 

 

 

 

 

 

 
 

Naxışlarda yaşayan qədim el sənəti – xalçaçılıq

Azərbaycan Respublikasının Prezidenti cənab İlham Əliyevin “Azərbaycan Respublikasında “Xalçaçı günü” peşə bayramının təsis edilməsi haqqında” 2016-cı il 25 noyabr tarixli Sərəncamına əsasən hər il mayın 5-i ölkəmizdə “Xalçaçı günü” peşə bayramı kimi qeyd edilir.

Azərbaycanda toxuculuğun tarixi 5-7 min il bundan əvvələ gedib çıxır. Naxçıvanda duz istehsalına başlanması, duzun tədavülü və daşınmasında torba və xurcunlardan istifadə toxuculuq sənətinin də qədim tarixindən xəbər verir. Toxuculuğun inkişafı isə xalçaçılıq sənətinin yaranması üçün geniş imkanlar açmışdır. Herodot, Klavdi Elian, Ksenofont və digər qədim dünya tarixçilərinin əsərlərində, “Kitabi-Dədə Qorqud” dastanında, Nizami Gəncəvinin yaradıcılığında Azərbaycan xalçaları haqqında məlumatlar verilmiş, bu dəyərli mədəni irsimiz tərənnüm olunmuşdur. Görkəmli Azərbaycan və dünya rəssamlarının tablolarında da təsvir olunan xalçalarımız bu gün dünyanın məşhur muzeylərinin ən dəyərli eksponatlarındandır.

Xalqının milli sərvətinin qorunması, yaşadılması, gələcək nəsillərə çatdırılması ümummilli liderimiz Heydər Əliyevin həyat amalı idi. Ulu öndər deyirdi: “Hər bir xalqın mədəni irsi onun milli sərvəti, tarixi və bu günüdür”. Dahi şəxsiyyət ölkəmizə rəhbərlik etdiyi hər iki dövrdə xalçaçılıq sənətinin yaşadılması və inkişafı istiqamətində də mühüm tədbirlər həyata keçirmişdir. Ötən əsrin 70-ci illərində Azərbaycanda Xalça Muzeyinin yaradılması, bu sahə ilə məşğul olan tədqiqatçıların, xalçaçıların diqqət və qayğı ilə əhatə edilməsi ulu öndərimizin mühüm xidmətlərindən biridir. Ümummilli liderimiz hələ 1983-cü ildə Moskvada SSRİ Nazirlər Soveti Sədrinin birinci müavini olduğu zaman Bakıda YUNESKO-nun Şərq Xalçaları üzrə Beynəlxalq Konfransının xətti ilə Azərbaycan xalçasının tanıdılması məqsədilə simpoziumun keçirilməsinə nail olmuşdur. Bu, keçmiş SSRİ məkanında Şərq xalça sənətinə aid birinci simpozium kimi tarixə düşmüşdür. Çoxsaylı xarici qonağın iştirak etdiyi bu simpozium əsl xalça bayramına çevrilmiş, Azərbaycan xalçasının tanıdılmasında və təbliğində mühüm rol oynamışdır.

Ardını oxu...

 
 

“5 May-Xalçaçı Günü”nə həsr olunmuş açıq dərsdə tələbələr xalça toxunması ilə tanış olmuşlar

Mayın 5-də Naxçıvan Dövlət Xalça Muzeyində Nazirliyin hamiliyinə verilmiş Naxçıvan Dövlət Universitetinin muzeyşünaslıq, arxiv işi və abidələrin qorunması ixtisası üzrə təhsil alan tələbələrinə  “5 May-Xalçaçı Günü” mövzusunda  açıq dərs keçirilmişdir.

Naxçıvan Muxtar Respublikası Mədəniyyət Nazirliyinin təşkilatçılığı ilə keçirilən açıq dərsdə giriş sözü ilə çıxış edən Nazirliyin şöbə müdiri Gülbuta Babayeva bildirmişdir ki, Azərbaycan xalq tətbiqi sənətinin növlərindən biri olan xalçaçılıq milli mədəniyyət tariximizdə özünəməxsus yer tutur. Azərbaycan Respublikasının Prezidenti cənab İlham Əliyevin “Azərbaycan Respublikasında “Xalçaçı günü” peşə bayramının təsis edilməsi haqqında” 2016-cı il 25 noyabr tarixli Sərəncamına əsasən, hər il mayın 5-i ölkəmizdə “Xalçaçı günü” peşə bayramı kimi qeyd edilir.

Bildirilmişdir ki, “Hər bir xalqın mədəni irsi onun milli sərvəti, tarixi və bu günüdür”, – deyən Azərbaycan xalqının ümummilli lideri Heydər Əliyev ölkəmizə rəhbərlik etdiyi hər iki dövrdə xalçaçılığın yaşadılması və inkişafı istiqamətində mühüm tədbirlər həyata keçirmişdir. Ötən əsrin 70-ci illərində Azərbaycanda Xalça Muzeyinin yaradılması, bu sahə ilə məşğul olan tədqiqatçıların, xalçaçıların diqqət və qayğı ilə əhatə edilməsi ulu öndərimizin mühüm xidmətlərindən biridir.

1983-cü ildə ulu öndər Moskvada SSRİ Nazirlər Soveti Sədrinin birinci müavini olduğu zaman Bakıda YUNESKO-nun Şərq Xalçaları üzrə Beynəlxalq Konfransının xətti ilə Azərbaycan xalçasının tanıdılması məqsədilə simpoziumun keçirilməsinə nail olmuşdur. “Azərbaycan xalça sənətinin qorunması və inkişaf etdirilməsi haqqında” Azərbaycan Respublikasının Qanunu qəbul olunmuşdur.

2010-cu ildə xalça sənətimiz YUNESKO-nun qeyri-maddi mədəni irs üzrə reprezentativ irs siyahısına daxil edilmişdir. Azərbaycan Prezidentinin 28 fevral 2018-ci il tarixli sərəncamı ilə “Azərbaycan Respublikasında xalça sənətinin qorunmasına və inkişaf etdirilməsinə dair 2018-2022-ci illər üçün Dövlət Proqramı” təsdiq olunmuşdur.

Ardını oxu...

 
 

Səhifə 10 > 284-dən

Joomla 1.5