Gənclər arasında növbəti onlayn kitab müzakirəsi keçirilmişdir

Naxçıvan Muxtar Respublikasının Mədəniyyət Nazirliyinin “Harmoniya” Gənclər Birliyinin üzvlərinin iştirakı ilə 25 fevral 2021-ci il tarixdə Amerikan yazıçısı Harper Linin “Bülbülü öldürmək” romanının onlayn müzakirəsi keçirilmişdir.

Gənclər Birliyinin sədri, Bəhruz Kəngərli Muzeyinin baş fond mühafizi elmi işçisi Səmanə Rüstəmova tədbiri giriş sözü ilə açaraq müzakirəni başlatmışdır. Birliyin üzvlərindən Rəfiqə Baxşıyeva, Şahsənəm Quliyeva, Müşkinaz Qafarova, Surə Əhmədli, Turqay Orucov və digərləri əsər haqqında məlumat vermiş, digər gənclər ilə əsər haqda təəssüratlarını bölüşmüşlər. Qeyd edilmişdir ki, 1960-cı ildə yazıçının qələmə aldığı roman qısa zaman ərzində məşhurlaşaraq Pulitser mükafatını qazanmış və 1962-ci ildə rejissor Robert Malliqan tərəfindən eyni adda çəkilən film isə Oskar mükafatına layiq görülmüşdür. Əsərin süjet xətti yazıçının 10 yaşı olarkən başına gələn bir hadisədən götürülmüşdür.

Hekayə Skot ləqəbli Cin Luis Finçin dilindən nəql olunur. Əsərin mövzusu irqi ayrıseçkilikdir. Əsas qəhrəman Attikus Finç, onun ailəsi və qonşularıdır. Vəkil Attikus, bir ağdərili qadına işgəncə verməkdə günahlandırılan qaradərili Tom Robinsonu müdafiə etdiyi üçün Meykom şəhərinin əksər sakinlərinin etirazına baxmayaraq ədaləti ortaya çıxarmaq üçün əlindən gələni edir. Onun obrazında əsl hüquq müdafiəçisinin necə olması hamıya örnəkdir. Başqa uşaqlar Attikusun günahsız bir insanı müdafiə etdiyi üçün övladları Cem və Skotu ələ salır və onu “Qaraları sevən” adlandırırlar.

Bir saat davam edən tədbirdə 20 yaxın gənc iştirak etmiş və sonda tədbir diskussiya formasında yekunlaşmışdır.

 

Naxçıvan Muxtar Respublikası

Mədəniyyət Nazirliyinin mətbuat xidməti

25.02.2021

 

Hamilikə bağlı növbəti tədbir keçirilmişdir

Fevralın 24-də Naxçıvan Muxtar Respublikasının Mədəniyyət Nazirliyinin  təşkilatçılığı ilə M.S.Ordubadi adına Naxçıvan Muxtar Respublika Kitabxanasında Naxçıvan Müəllimlər İnstitutunun “Kitabxanaçılıq və informasiya” ixtisası üzrə təhsil alan tələbələrinə “Kütləvi tədbirlərin keçirilmə qaydaları” adlı açıq dərs keçirilmişdir. Aşıq dərsi giriş sözü ilə M.S.Ordubadi adına Naxçıvan Muxtar Respublika Kitabxanasının direktoru Tamella Əsgərova açaraq bildirmişdir ki, bu günkü açıq dərs Naxçıvan Muxtar Respublikası Ali Məclisi Sədrinin “Ali və orta ixtisas təhsili müəssisələrində ixtisasların müvafiq təşkilatlara hamiliyə verilməsinə dair əlavə tədbirlər və innovasiyaların dəstəklənməsi haqqında” 2019-cu il 3 aprel tarixli Sərəncamına uyğun olaraq təşkil olunmuşdur. Sərəncam muxtar respublikada fəaliyyət göstərən ali təhsil müəssisələri ilə müvafiq təşkilatlar arasında əməkdaşlığı genişləndirmək, peşəkar kadr potensialı hazırlamaq, bu sahədəki çətinlikləri aradan qaldırmaq, tələbələrə elmi-nəzəri biliklərlə yanaşı, təcrübi biliklər də aşılamaq baxımından mühüm əhəmiyyət kəsb edir.

Ardını oxu...

 
 

Gənclər arasında növbəti bilik yarışı keçirilib

Fevralın 23-də Naxçıvan Muxtar Respublikası Mədəniyyət Nazirliyinin Gənclər Təşkilatının üzvləri arasında onlayn intellektual bilik yarışı keçirilmişdir.

Yarış başlamazdan əvvəl “Xan Sarayı” Dövlət Tarix-Memarlıq, Möminə Xatın və Açıq Səma Altında Muzey Kompleksinin bərpaçı rəssamı, “Turan” Gənclər birliyinin sədri Cəlal Rzayev çıxış edərək bildirmişdir ki, artıq ənənə halını alan onlayn intellektual bilik yarışları 2019-cu ildən etibarən keçirilməyə başlanmışdır. Qeyd edilib ki, Mədəniyyət Nazirliyinin təşkilatçılığı ilə keçirilən bilik yarışının məqsədi gənclərin hazırlıq səviyyəsinin artırılması, cəld və analitik düşünmə bacarığının inkişaf etdirilməsi, intellektual yarışlarda iştirak səriştələrinin və gənclərin müasir dünyagörüşünün, habelə gənclər arasında yoldaşlıq münasibətlərinin və komanda ruhunun formalaşdırması yolu ilə sosial çevrələrinin genişləndirilməsi məqsədini daşımışdır. Bilik yarışı mədəniyyət, incəsənət, folklor, ədəbiyyat, tarix və başqa sahələri əhatə edən suallar əsasında keçirilir.

Qeyd edilib ki, yarışda “Turan”, “Nəqşicahan” və “Harmoniya” gənclər birliklərinin üzvlərindən ibarət, hər birində 6 nəfərin olduğu “Buta” komandası, “Odlar yurdu” komandası və “Şəms” komandası yarışacaqdır. 1 saat davam edən və ümumilikdə 20 nəfərin iştirak etdiyi yarışın sonunda

“Odlar yurdu” komandası 1-ci, “Buta” komandası 2-ci və “Şəms” komandası 3-cü yerin qalibi olmuşdur.

Naxçıvan Muxtar Respublikası

Mədəniyyət Nazirliyinin mətbuat xidməti

23.02.2021

 
 

Tələbələr arasında Nizami Gəncəvinin “Sirlər xəzinəsi” poemasının müzakirəsi keçirilib

Fevralın 23-də 2021-ci ilin respublikamızda “Nizami Gəncəvi” ili elan olunması ilə əlaqədar Naxçıvan Musiqi Kollecinin tələbələrinin iştirakı ilə “Sirlər xəzinəsi” poemasının müzakirəsi keçirilmişdir.

Tədbiri Kollecin təlim-tərbiyə işləri üzrə direktor müavini Səmirə Hüseynova açmışdır. O qeyd etmişdir ki, Nizaminin ilk iri həcmli əsəri “Sirlər xəzinəsi” poemasıdır. Yaxın və Orta Şərq ədəbiyyatında didaktik poema janrının ən qiymətli nümunəsi olan bu əsər dahi şairin yaradıcılığında epik şeir sahəsində ilk qələm təcrübəsi idi. Əsər hicri tarixilə 570-ci ildə yazılmışdır ki, miladi təqvimi ilə 1174-1175-ci illərə uyğun gəlir. Poemadakı “Beş yüz ilə yetmiş olub, qalx, oyan, Gün qalxıb, məclisə gəl durmadan” beyti və bir sıra başqa faktlar poemanın 1174-cü ilin avqustundan 1175-ci ilin iyul ayına qədər olan dövrdə yazıldığını təsdiq etməkdədir. Poemanın bəzi əlyazmalarında olan artırma misralara görə, əsər 1176-cı il sentyabr ayının 30-da tamamlanmışdır. Bu, yəqin ki, əsər yazılandan bir qədər sonra köçürülən nüsxələrdən birinin tarixidir.

Sonra Kollecin Tələbə Gənclər Təşkilatının sədri Həlimə İbrahimli və musiqi nəzəriyyəsi fənn birləşmə komissiyasının sədri Könül Səfərova əsər haqqında məlumat vermişdir. Vurğulanmışdır ki, “Sirlər xəzinəsi” adından da göründüyü kimi, zahirən Nizamiyə qədər Yaxın və Orta Şərq ədəbiyyatında geniş yayılan didaktik əsərlər silsiləsinə daxildir. Mövzuca, məqsədcə müəyyən dərəcədə “Kəlilə və Dimnə”, “Qutadqu bilik”, “Hədiqətül-həqiqə”, “Siyasətnamə”, “Qabusnamə”, “Cəhar məqalə” və b. kimi əsərlərə yaxın olan “Sirlər xəzinəsi” həm də onlardan fərqlənir. Dahi şair sanki özünəqədərki didaktik ədəbiyyatı yekunlaşdırıb ona daha yüksək humanist, demokratik istiqamət vermişdir.

Sonda tələbələr də əsər haqqında fikirlərini bildirmiş onları maraqlandıran suallar cavablandırılmışdır.

Naxçıvan Muxtar Respublikası

Mədəniyyət Nazirliyinin mətbuat xidməti

23.02.2021

 
 

Hamiliklə bağlı tədbir keçirilmişdir

Fevralın 23-də Naxçıvan Muxtar Respublikası Ali Məclisi Sədrinin “Ali və orta ixtisas təhsili müəssisələrində ixtisasların müvafiq təşkilatlara hamiliyə verilməsinə dair əlavə tədbirlər və innovasiyaların dəstəklənməsi haqqında” 3 aprel 2019-cu il tarixli Sərəncamın icrası ilə bağlı A.Babayev adına Naxçıvan Muxtar Respublika Uşaq Kitabxanası tərəfindən Naxçıvan Dövlət Universitetinin kitabxana-biblioqrafiya ixtisası üzrə təhsil alan II kurs tələbələri ilə “Oxunması zəruri olan kitablar siyahısı”na daxil olan “A.S.Qriboyedov: şair-diplomat” kitabının müzakirəsi keçirilmişdir.

Tədbiri Naxçıvan Dövlət Universitetinin Tarix-filologiya fakultəsinin dekanı, tarix üzrə fəlsəfə doktoru, dosent Rəsul Bağırov açaraq, Naxçıvan Muxtar Respublika Ali Məclisi Sədrinin “Oxunması zəruri olan kitabların siyahısının təsdiq edilməsi haqqında” Sərəncamı və bu sərəncamdan irəli gələn vəzifələr haqqında danışmış, gələcək kitabxanaçıların kitabları mütaliə etmələrinin onların fəaliyyətinə müsbət təsir edəcəyinə əminliyini vurğulamışdır.

A.Babayev adına Naxçıvan Muxtar Respublika Uşaq Kitabxanasının Metodika və biblioqrafiya şöbəsinin müdiri Mehriban Seyidova “Reyhan Mirzəzadənin həyat və yaradıcılığı”, Komplektləşdirmə şöbəsinin müdiri Xədicə Hüseynova  “A.S.Qriboyedovun fəaliyyətində Naxçıvan mövzusu” mövzularında çıxış etmişlər. Çıxışçılar kitab müəllifini Azərbaycan-Rusiya ədəbi əlaqələrinin inkişafına səylə çalışan bir yazar kimi qiymətləndirərək, kitabda A.S.Qriboyedovun fəaliyyətində Naxçıvan mövzusu geniş yer aldığından, Türkmənçay və Gülüstan müqavilələrinin bağlandığı zaman ermənilərin cənubi Qafqaza köçürülmə siyasətindən ətraflı söz açdılar.

Sonra kitab müzakirə edilmiş, tələbələrin sualları cavablandırılmışdır.

 

Naxçıvan Muxtar Respublikası Mədəniyyət

Nazirliyinin mətbuat xidməti

23.02.2021

 
 

Səhifə 8 > 269-dən

Joomla 1.5