Tarix-Diyarşünaslıq Muzeyi müasir binada fəaliyyət göstərəcək

Muxtar respublikamızın hər bir rayonunda kompleks tikinti-quruculuq işləri uğurla davam etdirilir. Tariximizi özündə yaşadan, qoruyan və gələcək nəsillərə çatdıran muzeylərimiz də bu qayğıdan kənarda qalmır. Belə ki, hazırda Şahbuz rayonunda Tarix-Diyarşünaslıq Muzeyi üçün yeni binanın tikintisi davam etdirilir. 2 mərtəbədən ibarət olacaq binada geniş Sərgi Salonu ilə yanaşı, fond, bələdçilər, direktor, qazanxana və elektrik, texniki işçilər, bərpaçı rəssam otaqları və foye nəzərdə tutulub.
Artıq son tamamlanma işləri görülən, ümumilikdə, 591 kvadratmetr sahəni əhatə edəcək yeni muzey binasında ziyarətçilərə tariximizin təbliği üçün geniş şərait yaradılacaq.

 

"Şərq qapısı" qəzeti

02.03.2021

 

Naxçıvan Müəllimlər İnstitutunun tələbələrinə “Nizami” filminin nümayişi təşkil olunmuşdur

Naxçıvan Muxtar Respublikası Ali Məclisi Sədrinin “Ali və orta ixtisas təhsili müəssisələrində ixtisasların hamiliyə verilməsinə dair əlavə tədbirlər və innovasiyaların  dəstəklənməsi haqqında” 2019-cu il 3 aprel tarixli Sərəncamından irəli gələn vəzifələrin icrası Naxçıvan Muxtar Respublikasının Mədəniyyət Nazirliyi tərəfindən daim diqqətdə saxlanılır. Bu məqsədlə  3 mart 2021-ci il tarixdə Naxçıvan Müəllimlər İnstitutunun tələbələrinə “Nizami” filminin nümayişi təşkil olunmuşdur.

Naxçıvan Müəllimlər İnstitutunda keçirilən tədbirdə giriş sözü ilə çıxış edən Naxçıvan Dövlət Film Fondunun direktoru Mirakif Seyidov qeyd etmişdir ki, Nizami Gəncəvi orta əsrlər şərqinin ən böyük şairlərindən biri, Azərbaycan farsdilli poeziyasının klassiki,  farsdilli epik poeziyaya danışıq dili və realistik stili gətirmiş sənətkardır.

Nizaminin yaradıcılığı Hafiz Şirazi, Mövlana Cəlaləddin RumiSədi Şirazi kimi böyük sənətkarların yaradıcılığına da təsir etmişdir. Onun müxtəlif ictimai, mədəni və elmi mövzuları işıqlandıran beş məsnəvisi bütün şərq ölkələrində böyük məşhurluğa malik olmuşdur ki, bunu da, şairin əsərlərinin çoxlu sayda və müxtəlif dövrlərə aid əlyazmalarının dövrümüzə çatması sübut edir. Nizaminin Xosrov və ŞirinLeyli və Məcnun və “İsgəndərnamə” kimi əsərlərinin qəhrəmanları, indi də, bütün islam ölkələrində, eləcə də dünyada tanınmaqdadır.

Qeyd olunmuşdur ki, 1982-ci ildə rejissor Eldar Quliyev tərəfindən ekranlaşdırılmış film dahi Azərbaycan şairi Nizami Gəncəviyə həsr olunmuşdur. Filmdə şairin obrazı, o uzaq illərdə Azərbaycan xalqının siyasi və sosial həyatının ab-havası, insan münasibətlərinin mürəkkəb dünyası öz əksini tapmışdır. Bu film insanın tarixdə rolu, onun adamlar qarşısında borcu haqqında düşüncələrdir. Nizaminin mənəvi idealı ilə reallıq arasında uyğunsuzluq şairin insana və ədalətə inamını qıra bilməmişdir.

Filmdə əsas rollarda Müslüm Maqomayev, Həmidə Ömərova, Həsənağa Turabov, Ələddin Abbasov, Hacımurad Yegizarov, Şahmar Ələkbərov, Hamlet Xanızadə və başqaları çəkilmişlər.

Naxçıvan Muxtar Respublikası Mədəniyyət

Nazirliyinin mətbuat xidməti

03.03.2021

 
 

Fevral ayında onlayn formatda tamaşa nümayiş etdirilmiş, bir sıra mədəni tədbirlər həyata keçirilmişdir

Ötən ayın ən əlamətdar mədəni hadisələrindən biri Cəlil Məmmədquluzadə adına Naxçıvan Dövlət Musiqili Dram Teatrında Vaqif Səmədoğlunun “Mamoy kişinin yuxuları” pyesi əsasında hazırlanan eyniadlı tamaşanın onlayn formada teatrsevərlərə nümayişi olmuşdur. Tamaşa Naxçıvan Dövlət Televiziyasından, həmçinin Naxçıvan Muxtar Respublikası Mədəniyyət Nazirliyinin rəsmi internet saytından və sosial şəbəkə hesablarında canlı olaraq yayımlanmışdır.

Naxçıvan Muxtar Respublikası Ali Məclisi Sədrinin “Ali və orta ixtisas təhsili müəssisələrində ixtisasların müvafiq təşkilatlara hamiliyə verilməsinə dair əlavə tədbirlər və innovasiyaların dəstəklənməsi haqqında” 3 aprel 2019-cu il tarixli Sərəncamının icrası ilə bağlı nazirliyin hamiliyinə verilmiş Naxçıvan Dövlət Universitetinin və Naxçıvan Müəllimlər İnstitutunun müvafiq ixtisasları üzrə təhsil alan tələbələri üçün 2 açıq dərs keçilmiş, 1 mühazirə oxunmuş, 1 kitab müzakirəsi təşkil edilmiş və 1 film nümayişi olunmuşdur. Bundan başqa, tələbələrin nəzəri biliklərinin praktik işdə tətbiqi ilə bağlı Naxçıvan Müəllimlər İnstitutunun nazirliyin hamiliyində olan “Təsviri incəsənət müəllimliyi” ixtisasının II kurs tələbələrinə Naxçıvan Dövlət Tarix Muzeyində praktik dərsin keçmələri təmin edilmişdir.

Fevral ayında da muxtar respublika sakinlərinin, eləcə də Azərbaycanın digər bölgələrindən və xarici ölkələrdən muxtar respublikamıza səfər edən qonaqların, rəsmi nümayəndə heyətlərinin muzeylərlə tanışlığı zamanı onlara nümunəvi muzey xidməti göstərilmişdir. Son bir ayda muxtar respublikanın muzeylərini 9 min 668nəfər yerli, 260 nəfər əcnəbi olmaqla, ümumilikdə, 9 min 928 nəfər tamaşaçı ziyarət etmiş, muzeylərə 119 ədəd yeni eksponat daxil olmuşdur.

Naxçıvan Muxtar Respublikası Ali Məclisi Sədrinin “Naxçıvan Muxtar Respublikasının təhsil müəssisələrində elektron təhsilin təşkili ilə bağlı əlavə tədbirlər haqqında” 2014-cü il 20 iyun tarixli Sərəncamına uyğun olaraq, aid təşkilatlarla birgə Dövlət Bayrağı Muzeyində, Cəlil Məmmədquluzadənin anadan olmasının 152-ci ildönümü münasibəti ilə Cəlil Məmmədquluzadənin Ev Muzeyində və Xocalı faciəsinin növbəti ildönümü ilə əlaqədar Xatirə Muzeyində interaktiv dərslər keçilmişdir. Bu dərslər muxtar respublikanın 200-dən çox təhsil müəssisəsi tərəfindən izlənmişdir. Bundan başqa, Naxçıvan Muxtar Respublikasının Təhsil və Mədəniyyət nazirliklərinin birgə qrafikinə əsasən, ümumtəhsil məktəblərinin şagirdləri üçün muxtar respublikadakı muzeylərdə, ümumilikdə, 57 açıq dərs keçilmiş, 1 mühazirə oxunmuşdur.

Ötən ay Xocalı faciəsinin 29-cu ildönümü ilə bağlı Naxçıvan Dövlət Tarix, Xatirə və Tarix-Diyarşünaslıq muzeylərində tədbirlər keçirilmiş, sərgilər qurulmuşdur.

Fevral ayı muxtar respublikadakı muzeylərdə keçirilən mədəni tədbirlərin zənginliyi ilə yaddaqalan olmuşdur. Belə ki, ötən ay Heydər Əliyev Muzeyinin yaradılmasının 22 və Şahtaxtinskilər Muzeyinin yaradılmasının 11 illiyi qeyd edilmiş, Cəlil Məmmədquluzadənin anadan olmasının 152-ci ildönümü münasibətilə Cəlil Məmmədquluzadənin Naxçıvan şəhərindəki Ev və Şərur rayonundakı Cəlilkənddə Xatirə muzeylərində tədbirlər keçirilmişdir.

Fevral ayı ərzində muxtar respublikanın muzeyləri sosial şəbəkə hesablarında onlayn ekskursiyalar, əlamətdar və tarixi günlər, tanınmış şəxsiyyətlər, habelə muzeylərdə olan eksponatlarla bağlı məlumat və təbliğat xarakterli 229 sayda paylaşım etmiş, bu hesablara Azərbaycanın ərazi bütövlüyü, müstəqilliyi uğrunda mübarizədə şəhid olmuş Milli qəhrəmanların doğum və anım günləri münasibətilə videomateriallar, slaydlar yerləşdirmişlər. Onu da qeyd edək ki, ötən ay muxtar respublikanın muzeylərinə sosial şəbəkə istifadəçiləri üçün 8 onlayn ekskursiya təşkil edilmişdir. Ümumilikdə, fevral ayında muzeylər tərəfindən “İnstagram” səhifələrində 287, “Facebook” hesablarında isə 188 paylaşım olmuşdur. Bu paylaşımları 60 minə yaxın internet istifadəçisi izləmişdir.

Ardını oxu...

 
 

Xatirə Muzeyində Xocalı faciəsi ilə bağlı növbəti interaktiv dərs keçirilmişdir

Amansızlığına, qəddarlığına görə bəşər tarixinə qanlı iz salmış, təkcə Azərbaycan xalqına deyil, bütün insanlığa qarşı yönəlmiş Xocalı qətliamından bizi 29 il zaman məsafəsi ayırır.

Fevral ayının 26-da Naxçıvan Muxtar Respublikanın ümumtəhsil məktəbləri ilə Naxçıvan şəhərindəki Xatirə Muzeyi arasında “Xocalı faciəsi insanlığa qarşı cinayətdir” mövzusunda interaktiv dərs keçirilib.

Dərsi  muzeyin bələdçisi Tamara Novruzova aparıb. Dərs zamanı qeyd olunub ki, əvvəldən planlaşdırılmış əməliyyatın qəddarlığına baxmayaraq, Xocalı sakinləri son anadək özlərini əsl qəhrəman kimi aparmış, düşmən qarşısında əyilməmişlər.

Vurğulanıb ki, Xocalı soyqırımını törətməkdə ermənilərin əsas məqsədi xalqımızın mübarizə əzmini qırmaq və əhəmiyyətli geostrateji mövqeyə sahib olmaq idi. 1992-ci il fevralın 25-dən 26-na keçən gecə ermənilər Xocalıda misligörünməmiş soyqırımı törətmişdir. Dağlıq Qarabağın ən iri yaşayış məskəni 366-cı motoatıcı alayın, eləcə də xarici ölkələrdən gətirilmiş muzdlu döyüşçülərin hesabına ermənilərin əlinə keçmişdir. Döyüşlərdə canlı qüvvə az olsa da, silah-sursat çatışmasa da, qəhrəman Xocalı döyüşçüləri düşmənə qarşı inadlı mübarizə aparmışdır. Mühasirədən çıxıb xilas olmağa çalışan dinc sakinlər yollarda, meşələrdə xüsusi amansızlıqla qətlə yetirilmişdir.

Bildirilib ki, həmin dövrdə Naxçıvan Muxtar Respublikası Ali Məclisinin Sədri vəzifəsində işləyən ümummilli liderimiz Heydər Əliyev ilk dəfə Naxçıvanda Xocalı soyqırımı haqqında xüsusi bəyanat vermiş, faciəni törədənlərin və səbəbkarların məsuliyyətə cəlb olunmasını tələb etmişdir. Ulu öndərin 1993-cü ildə Azərbaycanda yenidən siyasi hakimiyyətə qayıdışından sonra Xocalı faciəsinə hüquqi-siyasi qiymət verilmiş, bu soyqırımı haqqında həqiqətlərin beynəlxalq ictimaiyyətə çatdırılması üçün təsirli tədbirlər görülmüşdür. 1994-cü ilin fevralında ulu öndər Heydər Əliyevin təşəbbüsü ilə Azərbaycan Respublikasının Milli Məclisi Xocalıda baş vermiş hadisələri geniş təhlil edərək “Xocalı Soyqırımı Günü haqqında” Qərar qəbul etmiş, BMT-yə, dünya dövlətlərinə müraciət edərək erməni terrorizminə qarşı qəti tədbirlər görməyə çağırmışdır.

Vurğulanıb ki, son illər Xocalı həqiqətlərinin dünyaya tanıdılması, erməni terrorçularının həyata keçirdiyi insanlıq əleyhinə cinayətlərin beynəlxalq miqyasda ifşası sahəsində xeyli iş görülüb. Xarici dillərdə kitablar nəşr olunub, Xocalı soyqırımı müxtəlif beynəlxalq tədbirlərdə gündəmə gətirilib, bununla bağlı internet saytları yaradılıb. Aparılan səmərəli işin nəticəsidir ki, hər dəfə faciənin ildönümündə dünyanın bir çox ölkəsində Xocalı qurbanlarının əziz xatirəsi anılır, mitinqlər, piketlər keçirilir, erməni vəhşiliklərini əks etdirən fotoşəkillər, filmlər, materiallar nümayiş etdirilir. Dünya ölkələrinin nüfuzlu qəzetlərində faciəyə həsr olunmuş məqalələr çap olunur, televiziya və radiolarda verilişlər hazırlanır. Dünya dövlətləri də artıq ermənilərin törətdikləri bu soyqırımına öz münasibətlərini bildirir və Xocalıda törədilmiş qətliamı kəskin pisləyirlər.

Qeyd olunub ki, bu gün Azərbaycan Ordusu düşmənin çirkin niyyətləri qarşısında ən böyük və keçilməz maneəyə çevrilib. Azərbaycan xalqı heç vaxt işğalla barışmadı. 2020-ci il 27 sentyabrda başlayan 44 günlük müharibədə müzəffər Azərbaycan ordusu Ali Baş Komandanın rəhbərliyi ilə  işğal olunmuş torpaqları azad etdi. Azərbaycan xalqı və dövləti Xocalı faciəsini heç vaxt unutmur və unutmayacaqdır.

İnteraktiv dərs Naxçıvan Muxtar Respublikasının 200-dən artıq ümumtəhsil məktəbində izlənilmişdir.


Naxçıvan Muxtar Respublikası

Mədəniyyət Nazirliyinin mətbuat xidməti

26.02.2021

 
 

Hamiliklə bağlı növbəti mühazirə keçilib

Fevralın 25-də Naxçıvan Muxtar Respublikasının Mədəniyyət Nazirliyinin təşkilatçılığı ilə Nizami Gəncəvinin 880 illik yubileyi münasibətilə Naxçıvan Müəllimlər İnstitutunun Nazirliyin hamiliyinə verilmiş ixtisaslarının tələbələri üçün “Nizami Gəncəvi yaradıcılığında türkçülük” mövzusunda mühazirə keçilib.

Mühazirədə Mədəniyyət üzrə Elmi-Metodik Mərkəzin direktoru Səyyar Məmmədov bildirib ki, böyük Azərbaycan şairi və mütəfəkkiri Nizami Gəncəvinin dünyagörüşündə türk mənsubiyyətinə, türk ruhuna, eləcə də İslama dair motivlər olduqca güclüdür. N.Gəncəvi birmənalı şəkildə öz ailəsini türk adlandırmış və türklükləri ilə fəxr etmişdir. Onun yaradıcılığında əski türk düşüncəsinə, türk dini etiqadlarına, ümumilikdə, türk mədəniyyətinə, fəlsəfəsinə böyük dəyər verdiyini açıq şəkildə görə bilirik. N.Gəncəvi “Xəmsə”sini farsca yazmasına baxmayaraq, türk düşüncəsini, türk adət-ənənəsini, türk əxlaqını, ümummilikdə, türk mifoloji, dini-fəlsəfi və milli-mənəvi dünyagörüşünü təbliğ etmişdir.

Vurğulanıb ki, N.Gəncəviyə görə, dünyada müdriklik, əxlaqi dəyərlər, nəciblik, alicənablıq, igidlik, paklıq və s. kimi xüsusiyyətlər, yəni yaxşı nə varsa, türkə, türk millətinə aiddir. Filosof-şair “Sirlər xəzinəsi”ndə dəfələrlə türk düşüncəsinə, türk etiqadlarına müraciət etmişdir. “Xosrov və Şirin” poemasında isə N.Gəncəvi açıq şəkildə yazır ki, türklərin köku bu millətin ulu əcdadı Alp Ər-Tonqa, divani-etiqadı isə Günəşə sitayişlə bağlıdır:

“Əgər o, Aydırsa, biz (yəni türklər) Aftiabıq (yəni Günəşik),o, Key-xosrovdursa, bizsə Əfrasiyabıq (yəni Alp Ər Tonqayıq)”,

– deyən dahi mütəfəkkirin təkcə bu misraları sübut edir ki, N.Gəncəvi özünün türk olması ilə hər zaman fəxr etmişdir.

“Fikrimizcə, N.Gəncəvinin “İsgəndərnamə”ni yazmaqda məqsədi yalnız Makedoniyalı İsgəndərin timsalında adil hökmdarı, ədalətli cəmiyyəti təsvir etmək deyil, eyni zamanda, türk millətinin qədimliyini, türk inanclarını, adət-ənənələrini və s. dünyaya tanıtdırmaq olmuşdu”, – deyən mühazirəçi əlavə edib ki, bu baxımdan N.Gəncəvinin Makedoniyalı İsgəndəri türk dünyasının bir hissəsi olan Azərbaycana, daha sonra Qıpçaq elinə aparması təsadüf ola bilməzdi. N.Gəncəvinin burada başlıca məqsədi Azərbaycanda, Qafqazda, Orta Asiyada və başqa yerlərdə yaşayan türklərin adət-ənənələrini, mədəniyyətini, düşüncələrini və s. açıqlamaq olmuşdu. Məsələn, İsgəndəri Qıpçaq ellərinə aparan N.Gəncəvi yazır ki, qıpçaq türklərinin adət-ənənələri böyük fatehi mat qoyur, onu yaxşı mənada təəccübləndirir.

Sonra tələbələrin sualları cavablandırılıb, mövzu ilə bağlı müzakirə aparılıb.

Sonda “Nizami” sənədli filminin nümayişi olub.

Naxçıvan Muxtar Respublikası

Mədəniyyət Nazirliyinin mətbuat xidməti

25.02.2021

 
 

Səhifə 7 > 269-dən

Joomla 1.5