Uşaq və gənclər arasında muxtar respublika üzrə ifaçılıq müsabiqəsinə start verilib

Mayın 31-də Naxçıvan Dövlət Filarmoniyasında Naxçıvan Muxtar Respublikası Mədəniyyət Nazirliyinin təşkilatçılığı ilə muxtar respublika üzrə ifaçılıq müsabiqəsinə start verilib. Müsabiqədə Naxçıvan Musiqi Kollecinin və  muxtar respublikanın uşaq musiqi, incəsənət və bədii sənətkarlıq məktəblərində təhsil alan istedadlı uşaq və gənclər iştirak edirlər.

Tədbiri giriş sözü ilə açan Naxçıvan Muxtar Respublikası Mədəniyyət Nazirliyi Aparatının rəhbəri Piri Nağıyev müsabiqənin keçirilməsinin məqsəd və vəzifələri, musiqi mədəniyyətimizin inkişafı barədə məlumat vermişdir. Qeyd edilmişdir ki, muxtar respublikada gənc nəslin təhsili ilə yanaşı, onların istedad və bacarıqlarının üzə çıxarılması, asudə vaxtlarının səmərəli təşkili istiqamətində də ardıcıl tədbirlər görülür. Mədəniyyətin, xüsusilə musiqi sənətinin inkişafı əsas vəzifələr sırasındadır. Uşaq musiqi və bədii sənətkarlıq məktəbləri üçün yeni binalar tikilərək istifadəyə verilir, gənc nəslə milli musiqi sənətimizin öyrədilməsi istiqamətində ardıcıl tədbirlər həyata keçirilir. Yaradılan şəraitin nəticəsidir ki, Naxçıvan Musiqi Kollecinin və uşaq musiqi, incəsənət və bədii sənətkarlıq məktəblərinin tələbə və şagirdləri ölkəmizdə, eləcə də ölkə səviyyəsində keçirilən müsabiqələrdə uğurla iştirak edirlər.

Piri Nağıyev müsabiqə barədə məlumat verərək bildirmişdir ki, muxtar respublikada musiqi sənətinin inkişaf etdirilməsi, gənc istedadların aşkara çıxarılması, onların ifaçılıq səviyyəsinin yüksəldilməsi əsas məqsədlərimizdəndir. Müsabiqə üç yaş qrupu (8-11, 12-15 və 16-19) olmaqla tar, kamança, qanun, saz, balaban, qarmon, fortepiano, skripka, klarnet, truba, fleyta ixtisasları üzrə keçirilir və 300 nəfərə yaxın iştirakçı iştirak edir.

Ardını oxu...

 

Açıq havada kino nümayişlərinə başlanmışdır

27 may 2021-ci il tarixdə Naxçıvan  Dövlət Film Fondu “Əyləncə adası” İstirahət Parkında açıq havada “Əbədi ezamiyyət” sənədli-bədii filminin  nümayişini təşkil etmişdir.

Tədbirdə giriş sözü ilə çıxış edən Naxçıvan Dövlət Film Fondunun direktoru Mirakif Seyidov qeyd etmişdir ki, Naxçıvan Muxtar Respublikası Mədəniyyət Nazirliyinin 2021-ci il iş planına əsasən may-sentyabr ayları ərzində həftədə bir dəfə olmaqla, “Əyləncə adası” İstirahət Parkında açıq havada dünya və azərbaycan kinosundan filmlərin nümayişi təşkil olunacaqdır.

Film 1919-cu ilin yanvarında Azərbaycan Xalq Cümhuriyyətinin parlament sədri Əlimərdan bəy Topçubaşovun rəhbərliyi ilə Paris Sülh Konfransına ezam edilən nümayəndə heyətinin keşməkeşli taleyindən bəhs edir.

Vurğulanmışdır ki, bu ekran əsəri 1993-cü ilin dekabrında ümummilli lider Heydər Əliyevin müstəqil Azərbaycan Respublikasının Prezidenti kimi Fransaya ilk rəsmi səfəri zamanı Paris yaxınlığındakı Sen-Klu qəbiristanlığına gedərək Paris Sülh Konfransının iştirakçısı olmuş Əlimərdan bəy Topçubaşovun və Ceyhun Hacıbəylinin qərib məzarlarını ziyarəti ilə yekunlaşır.

Rejissorları Fariz Əhmədov və Vüqar İslamzadə, ssenari müəllifi Müsəllim Həsənov, operatoru Rəşad Nuriyev olan film 2016-cı ildə “H. Əliyev Fondu”nun dəstəyi ilə “Bakı Media Mərkəzi”ndə istehsal olunmuşdur. Filmin baş prodüseri Arzu Əliyevadır.

Yaradıcı heyət filmin hazırlanması üçün ilyarım müddətində Bakı, Tbilisi, Moskva, Sankt-Peterburq və Paris şəhərlərindəki arxivlərdə araşdırmalar aparıb, bu şəhərlərdə video və fotoçəkilişlər edib, Fransada Azərbaycan mühacirəti ilə bağlı tədqiqat aparan alimlərlə görüşləri və söhbətləri lentə alıb.

 

Naxçıvan Muxtar Respublikası Mədəniyyət

Nazirliyinin mətbuat xidməti

27.05.2021

 
 

Gənclər arasında “Bir əsərin tarixçəsi” adlı tədbir keçirilib

Naxçıvan şəhərindəki “Saat Meydanı” Turistik İstirahət Mərkəzində Naxçıvan Muxtar Respublikası Mədəniyyət Nazirliyinin Gənclər Təşkilatının üzvləri arasında “Bir əsərin tarixçəsi” adlı tədbir-diskussiya keçirilib.

Tədbiri giriş sözü ilə Naxçıvan Muxtar Respublikası Mədəniyyət Nazirliyi Aparatının İncəsənət və təhsil müəssisələri ilə iş şöbəsinin aparıcı məsləhətçisi, Nazirliyin Gənclər Təşkilatının sədri Elvin Əhmədov açmışdır. Qeyd olunmuşdur ki, gənclərin asudə vaxtının səmərəli və faydalı təşkili və dünyagörüşünün artırılması baxımından bu tədbirlər xüsusi rol oynayır. 2021-ci ildə Naxçıvan Muxtar Respublikası Mədəniyyət Nazirliyinin Gənclər Təşkilatının fəaliyyətində mühüm dəyişikliklər aparılmışdır. İctimai əsaslarla fəaliyyət göstərən Gənclər Təşkilatının nəzdində 5 yeni gənclər birliyi yaradılmış və 150-ə yaxın gənc həmin birliklərə cəlb edilmişdir. Gənclər arasında istər onlayn, istərsə də ənənəvi üsulda yarış və müsabiqələr, maarifləndirici tədbir, diskussiyalar və müxtəlif formada tədbirlər təşkil olunur. Bu gün keçirilən tədbir də məhz onlardan biridir. Daha  sonra söz gənclərə verilmiş, gənclər musiqi, film və tarixi əsərlər barədə öncədən hazırladıqları materiallar vasitəsilə tədbir iştirakçılarına məlumat vermişlər. Tədbirdə Zeynəb Məmmədova “Ay işığında” mahnısı,  Fatimə Yusifli “Gəl ey səhər” mahnısı,  Aygül Xəlilova “Maçu Pikçu” tarixi abidəsi, Nuray Quluadə “Apardı sellər Saranı” şeiri və rəvayəti, Aysun Məhərrəmli “Qu quşu yuvasının üzərindən uçarkən” film və əsəri haqqında tədbir iştirakçılarına məlumat vermişlər. Gənclər ilk öncə videomateriallar vasitəsilə, daha sonra şifahi şəkildə mövzu barədə ətraflı məlumat vermiş, sonda isə digər gənclərin suallarını cavablandırmışlar.

Tədbir diskussiya formasında davam etdirilmişdir.

Naxçıvan Muxtar Respublikası Mədəniyyət

Nazirliyinin mətbuat xidməti

26.05.2021

 
 

“İntellektual kitabxanaçı” bilik müsabiqəsi keçirilib

Mayın 25-də Naxçıvan Şəhər Gənclər Mərkəzində Naxçıvan Muxtar Respublikası Mədəniyyət Nazirliyinin təşkilatçılığı ilə “İntellektual kitabxanaçı” bilik müsabiqəsi keçirilmişdir.

Müsabiqəni giriş sözü ilə Nazirliyin əməkdaşı Şəfəq Abbasova açaraq qeyd etmişdir ki, bilik müsabiqəsi Nazirliyin 2021-ci il 14 aprel tarixli 91 nömrəli əmri ilə təsdiq olunmuş Əsasnaməyə uyğun olaraq keçirilir. Müsabiqədə iştirak üçün rayon (şəhər) MKS-lərin 12 komandası ərizə ilə müraciət etmişdir. İştirakçılara müsabiqənin qaydaları  haqqında məlumat verilmişdir. Qeyd edilmişdir ki, komandalara Naxçıvan Muxtar Respublikası Ali Məclisi Sədrinin 28 avqust 2017-ci il tarixli Sərəncamı ilə təsdiq olunmuş “Oxunması zəruri olan kitabların siyahısı”na daxil olan kitablar, ümumi dünyagörüşü, kitabxana işi, Naxçıvan Muxtar Respublikasının tarixi, görkəmli şəxsiyyətləri, abidələri və s. üzrə suallar veriləcəkdir.

Müsabiqənin seçim turunda Naxçıvan Şəhər MKS-nin “Zəka”, Şərur Rayon MKS-nin “Ulduz”, “Araz” və “Şəms”, Babək Rayon MKS-nin “Zəfər”, “Xarı bülbül” və “Nuh yurdu”, Culfa Rayon MKS-nin “Əlincəqala”, Ordubad Rayon MKS-nin “Mədəni irs”, Şahbuz Rayon MKS-nin “Batabat”, Kəngərli Rayon MKS-nin “Zirvə”, Sədərək rayon MKS-nin “Ağoğlan” olmaqla, ümumilikdə 12 komanda iştirak etmişdir. Bu komandalardan  4-ü final turuna vəsiqə qazanmışdır.

Ardını oxu...

 
 

Muxtar respublikada xalçaçılığın inkişafı diqqət mərkəzindədir

Bu gün dünyada qədim mədəni tarixi və özünəməxsus mədəniyyət nümunələrinin çoxluğu ilə diqqəti cəlb edən ölkələr sırasında Azərbaycan xüsusi yer tutur. Ölkəmizin beynəlxalq mədəniyyət aləminə bəxş etdiyi dəyərli sənət nümunələri içərisində Azərbaycan xalçalarını ayrıca qeyd etmək lazımdır. Tarixboyu Azərbaycan xalçalarının şöhrəti ölkə sərhədlərini aşmış və mühüm sənətkarlıq nümunəsi kimi əvəz­olunmaz simvola çevrilmişdir. Ölkə Prezidenti cənab İlham Əliyev bununla bağlı demişdir: “Xalça bizim milli sənətimizdir. Biz hesab edirik ki, Azərbaycan xalça sənətinin Vətənidir, xalça muğam, memarlıq abidələri kimi bizim milli dəyərimizdir, sərvətimizdir”.

İstər xalqımızın malik olduğu işgüzarlıq ənənələri, istərsə də tarixi İpək Yolunun Azərbaycan ərazisindən keçməsi qədim dövrlərdən etibarən bu diyarda xalçaçılığın gəlirli məşğuliyyət növlərindən birinə çevrilməsinə səbəb olmuşdur. Təsadüfi deyil ki, müxtəlif tarixi dövrlərdə ölkəmizdə olmuş dünya şöhrətli səyyahların Azərbaycanla bağlı yazılı məlumatlarında xalçaçılıq ayrıca yer tutur. Bu tarixi mənbələr sübut edir ki, Azərbaycanda toxunan xalçaların özünəməxsus ornamentləri və quruluşu bu əraziyə səyahət edənlər üçün xüsusi maraq doğurmuşdur. Beləliklə, Azərbaycan xalçaları dünya mədəni irsinin bənzərsiz nümunələri sırasında ilk yerlərdən birini tutur. Təkcə onu qeyd etmək kifayətdir ki, 16 noyabr 2010-cu il tarixdə UNESCO-nun Qeyri-Maddi Mədəni İrs üzrə Hökumətlərarası Komitəsinin Keniyanın Nayrobi şəhərində keçirilmiş V sessiyasında Azərbaycan xalçaçılıq sənəti UNESCO-nun bəşəriyyətin qeyri-maddi irsi nümunələri siyahısına daxil edilmişdir. Ölkəmizin xalçaçılıq tarixində Naxçıvan xalçaçılıq məktəbi hər zaman özünəməxsus yer tutmuşdur. Müasir dövrümüzdə isə muxtar respublikada xalq yaradıcılığının müxtəlif ənənəvi sahələrinə göstərilən dövlət qayğısı xalça sənətindən də yan keçməmişdir. Görülən işlər və yaradılan şərait Naxçıvanda xalça sənətinin daha da inkişaf etdirilməsi üçün geniş imkanlar açır. Naxçıvan Muxtar Respublikası Ali Məclisi Sədrinin 2018-ci il 9 aprel tarixli Sərəncamı ilə təsdiq edilmiş “Naxçıvan Muxtar Respublikasında xalça sənətinin qorunmasına və inkişaf etdirilməsinə dair 2018-2022-ci illər üçün Dövlət Proqramı”nın da əsas məqsədi muxtar respublikada xalçaçılıq sahəsində maddi-mədəni irsin qorunması və davamlı inkişafının təmin edilməsindən ibarətdir.

Ardını oxu...

 
 

Səhifə 7 > 284-dən

Joomla 1.5