Açıq havada kino nümayişləri davam edir

01 iyul 2021-ci il tarixdə Naxçıvan Dövlət Film Fondu “Əyləncə adası” İstirahət Parkında açıq havada “Toqo” bədii filminin nümayişini təşkil etmişdir.

Rejissoru Erikson Kor olan “Toqo” filmi 2019-cu ildə lentə alınmışdır. Filmdə əsas rolları Uillem Defo, Culianna Nikolson, Kristofer Heyerdal, Riçard Dormer və başqaları ifa etmişlər.

Film Alyaskanın Nom qəsəbəsini bürümüş epidemiyanı müalicə etmək üçün yorucu bir səyahətə çıxan bir adam və bir itin hekayəsindən bəhs edir. Qəsəbədə ölümcül bir epidemiya baş verir ki, bu epidemiyanın yeganə müalicə yolu 600 mil uzaqlıqdakı qəsəbədədir. Şəhərdə tapılan antitoksin dərmanın gətirilməsi lazımdır, lakin bu asan bir iş deyil. Şəhər sakinləri serum əldə etmək üçün köpək təlimçisi Leonard Seppalaya müraciət edirlər. Kömək etmək üçün razılığa gələn Leonard Seppala, zəif görünüşlü qoca Sibir haskisi Toqo ilə yola düşür. Toqonu körpəliyindən tanıyan Seppalanın həyat yoldaşı Konstans, Toqonun hər vəziyyətdə cəsarət və sədaqət göstərəcəyinə əmindir. Dərmanın tapıldığı qəsəbəyə yaxınlaşan Seppala və Toqo səyahətlərində dəhşətli bir fırtına ilə qarşılaşırlar. Leonard və Toqo -70 dərəcəyə enən bu soyuq havada yaşamaq üçün mübarizə aparırlar.

Naxçıvan Muxtar Respublikası Mədəniyyət

Nazirliyinin mətbuat xidməti

01.07.2021

 

Açıq havada “Yarımçıq xatirələr” bədii filmi nümayiş olunmuşdur

24 iyun 2021-ci il tarixdə Naxçıvan Dövlət Film Fondu “Əyləncə adası” İstirahət Parkında açıq havada “Yarımçıq xatirələr” bədii filminin nümayişini təşkil etmişdir.

Rejissoru Elxan Cəfərov olan “Yarımçıq xatirələr” filmi Cəfər Cabbarlı adına “Azərbaycanfilm” kinostudiyasında 2015-ci ildə lentə alınıb. Filmin quruluşçu operatoru – Nadir Mehdiyev, bəstəkarı – Polad Bülbüloğludur. Əsas rolları Bəhruz Vaqifoğlu, Mixail Kaminskiy və başqaları ifa etmişlər.

Film 1941-ci ildə Brest qalasını faşistlərdən qəhrəmancasına qorumuş və 50 ildən sonra doğma Qarabağını erməni işğalçılarından müdafiə etməyə qalxmış bir əsgərin taleyindən bəhs edir. Filmin qəhrəmanı iki müharibənin iştirakçısıdır. Filmdəki hadisələr Qarabağ müharibəsinə rus zabitinin gözü ilə baxışı əks etdirir. Qarabağda ermənilər tərəfdə döyüşən rus kapitanı Vanya veteran Azəri öldürür, sonra isə yaşlı azərbaycanlı snayperçinin gündəliyini tapır. Babasının Böyük Vətən Müharibəsində veteran Azər ilə birgə döyüşdüyünü öyrənən rus zabiti onun meyitini Azərbaycan tərəfinə vermək üçün öz həyatını təhlükəyə atır, eyni zamanda gündəliyi vərəqlədikcə ekranda 1941–1945-ci illərin hadisələri canlanır.

 

Naxçıvan Muxtar Respublikası Mədəniyyət

Nazirliyinin mətbuat xidməti

24.06.2021

 
 

Uşaq və gənclər arasında keçirilmiş rəsm, rəqs, solo oxuma və ifaçılıq müsabiqələrinin yekununa həsr olunmuş tədbir keçirilib

İyunun 23-də Naxçıvan şəhərindəki Gənclik Mərkəzində Naxçıvan Muxtar Respublikasının Mədəniyyət Nazirliyinin təşkilatçılığı ilə uşaq və gənclər arasında keçirilmiş rəsm, rəqs, solo oxuma və ifaçılıq müsabiqələrinin yekununa həsr olunmuş tədbir keçirilib.

Tədbir başlamazdan əvvəl rəsm müsabiqəsində yer tutmuş şagirdlərin rəsm əsərlərindən ibarət sərgiyə baxış olub.

Daha sonra tədbirin rəsmi hissəsi başlayıb. Tədbirdə Naxçıvan Muxtar Respublikasının Mədəniyyət naziri çıxış edərək bildirib ki, Azərbaycanın zəngin musiqi sənəti çoxəsrlik inkişaf tarixinə malikdir. Arxeoloji qazıntılar zamanı əldə edilən bir sıra abidələr, eləcə də Qobustan və Gəmiqaya rəsmləri musiqi mədəniyyətimizin qədim tarixindən xəbər verir. “Kitabi-Dədə Qorqud” dastanında, Nizaminin, Füzulinin əsərlərində orta əsrlərin musiqi həyatı, musiqi janrları, musiqi alətləri barədə zəngin məlumatlar mövcuddur. Azərbaycan torpağının yetirməsi olan bir sıra məşhur alimlərin risalələrində orta əsr musiqi mədəniyyətinin, ifaçılığının yüksək inkişaf səviyyəsi açıqlanmış, Azərbaycan musiqisinin nəzəri problemləri öz əksini tapmışdır.

Qeyd olunub ki, milli mədəniyyətimizin mükəmməl sənət nümunələri kimi formalaşmasında Naxçıvan mədəniyyətinin də özünəməxsus rolu olmuşdur. Şübhə yoxdur ki, qədim Naxçıvan torpağı mədəniyyət, sənət, ədəbiyyat beşiyi kimi tanınmış, dünya mədəniyyətinə tanınmış sənətkarlar bəxş etmişdir. Naxçıvan tarixinin möhtəşəm sütunlarından biri olan musiqi sənəti heç bir dövrdə ictimai inkişafdan geri qalmamış, bu qədim diyar Azərbaycanın yüksək inkişaf etmiş mədəniyyət mərkəzlərindən biri kimi tanınmışdır.

Bu gün Naxçıvan Muxtar Respublikasında mədəniyyətimizin bütün sahələri kimi milli musiqimizin inkişafına da hərtərəfli dövlət qayğısı göstərilir. Son 25 ildə Naxçıvan şəhərində, rayon mərkəzlərində yeni uşaq musiqi və bədii sənətkarlıq məktəbləri inşa olunaraq istifadəyə verilmiş, Naxçıvan Dövlət Filarmoniyasının, Naxçıvan Dövlət Uşaq Filarmoniyasının maddi-texniki bazası gücləndirilmiş, Naxçıvan Muxtar Respublikası Bəstəkarlar Təşkilatının, Aşıqlar Birliyinin fəaliyyəti üçün yüksək iş şəraiti yaradılmışdır. Gənc nəslə milli musiqi sənətimizin aşılanması istiqamətində həyata keçirilən ardıcıl tədbirlərin, yaradılan şəraitin nəticəsidir ki, bu gün muxtar respublikada uşaq musiqi, incəsənət və bədii sənətkarlıq məktəblərinin şagirdləri ölkəmizdə, eləcə də beynəlxalq miqyasda keçirilən müsabiqələrdə uğurla iştirak edirlər.

Ardını oxu...

 
 

Açıq havada kino nümayişləri davam edir

18 iyun 2021-ci il tarixdə Naxçıvan Dövlət Film Fondu “Əyləncə adası” İstirahət Parkında açıq havada “Qisas almadan ölmə. Keçmişdən məktublar” bədii filminin nümayişini təşkil etmişdir.

2014-cü ildə ekranlaşdırılmış bu filmin rejissoru və ssenari müəllifi Oqtay Mirqasımdır.

XIX əsrin əvvəllərində Qafqazda məskunlaşan və 1941-1945-ci illər müharibəsində Stalinin əmri ilə Azərbaycandan deportasiya edilən alman kolonistlərin taleyinə həsr olunub. Deportasiya olunanların acı taleyi filmdə qürbətdə qocalan, amma doğma Azərbaycana qayıtmaq arzusunda olan Günterin faciəli taleyi nümunəsində göstərilib. Günter onu Azərbaycanı tərk etməyə məcbur etmiş satqını nəvəsi Rixardın köməyi ilə tapmaq istəyir. Amma gözlədiyinin əksi olur. Tanımadığı dünyaya düşən Rixard insan münasibətlərinin mahiyyətini həqiqi mənəvi iztirablar prizmasından anlamağa başlayır. Onda əcdadlarına səmimi sevgi və onların taleyini dərk etmək hissi yaranır. Süjet dərin əxlaqi məna daşıyır, insan həyatının hər şeyin fövqündə olduğunu göstərir.

Ardını oxu...

 
 

Aşıq Ələsgərin 200 illik yubileyinə həsr olunmuş yaradıcılıq müsabiqəsinin yekun tədbiri keçirilib

İyunun 18-də Naxçıvan şəhərindəki Gənclik Mərkəzində Naxçıvan Muxtar Respublikasının Mədəniyyət Nazirliyinin, Aşıqlar Birliyinin və Yazıçılar Birliyinin birgə təşkilatçılığı ilə təşkil olunmuş Aşıq Ələsgərin 200 illik yubileyi ilə əlaqədar yaradıcılıq müsabiqəsinin yekun tədbiri keçirilib.

Tədbirdə Naxçıvan Muxtar Respublikasının Mədəniyyət naziri Natəvan Qədimova çıxış edərək qeyd etmişdir ki, Azərbaycan aşıq poeziyasının zənginləşməsində və inkişafında xidmətləri olmuş el sənətkarlarından biri də Aşıq Ələsgərdir. XIX əsrin sonu, XX əsrin əvvəllərində Azərbaycan aşıq ədəbiyyatında Aşıq Ələsgər möcüzəsi ilə sazın, sözün yeni ömrü başlanmış, “Haqq aşığı” ifadəsi onun simasında yenidən öz təcəssümünü tapmışdır.

Özünəməxsus təbii gözəllikləri ilə seçilən və qədim yurd yerlərimizdən olan Göyçə mahalının Ağkilsə kəndində anadan olmuş Aşıq Ələsgərin zəngin bədii irsi toy və şənlik məclislərində, çeşmə başında, yaylaqlarda bədahətən dediyi gəraylı, qoşma, təcnis, deyişmə, ustadnamə, müxəmməs və digər janrlarda olan əsərlərdən ibarətdir. Onun şeirlərində başlıca yeri məhəbbətin tərənnümü, gözəllərin tərifi, təbiətin təsviri, vətənpərvərlik duyğularının və əxlaqi-tərbiyəvi fikirlərin təbliği, ictimai eyiblərin tənqidi tutur.

Vurğulanmışdır ki, Aşıq Ələsgərin böyüklüyü xalq həyatını, insan taleyini, onların sevinc və kədər hislərini məharətlə ifadə etməsindədir. Söz ustadı 80 illik fəaliyyəti ilə minillik ənənələr axarında insanların işlətdiyi adi sözlərlə hamını heyrətdə qoyacaq bir poeziya ümmanı yaratmışdır. O, qeyri-adi fitri qabiliyyəti sayəsində yaratdığı müxtəlif səpkili, müxtəlif məzmunlu bədii incilərində özünəməxsus boyalarla ifadə etdiyi ümumbəşəri fikirləriylə sənətin müqəddəs zirvəsinə yüksəlmişdir. Qüdrətli el sənətkarının yaratdığı əsərlər bu gün də aşıqlarımızın repertuarında geniş yer tutmaqda, şənliklərin, məclislərin bəzəyinə çevrilməkdədir. Aşıq Ələsgərin şan-şöhrəti təkcə Azərbaycanda deyil, Türkiyədə, İranda, Gürcüstanda, Dağıstanda, eləcə də Orta Asiya respublikalarında da məşhurdur.

Ardını oxu...

 
 

Səhifə 4 > 284-dən

Joomla 1.5