“Ad günü” bədii filmi nümayiş etdirilmişdir

İyulun 27-də Naxçıvan Dövlət Film Fondu Naxçıvan şəhərindəki “Əyləncə adası” İstirahət Parkında açıq havada “Ad günü” bədii filminin nümayişini təşkil etmişdir.

Lirik-psixoloji film həqiqi dostluq haqqındadır. Filmi “Dost haqqında söhbət” də adlandırmaq olar. Kinolentin qəhrəmanları bizim müasirlərimizdir: müxtəlif xarakterli, müxtəlif dünyagörüşlü insanlardır. Burada əxlaqi-etik məsələlərə toxunulur, müasirlərimizin mənəvi aləminin zənginliyi tədqiq edilir. Bu filmdə insan tədqiq və təsvir olunur, onun məişəti və yaşayışı, gündəlik həyatı ekranda canlandırılır.

“Ad günü” filmi rejissor Rasim Ocaqov tərəfindən 1977-ci ildə ekranlaşdırılmış, Mərkəzi Televiziyanın (Moskva) sifarişi ilə "Azərbaycanfilm" kinostudiyasında istehsal edilmişdir.

Filmə 1978-ci ildə Azərbaycan dövlət mükafatı, 1979-cu ildə Bakıda VIII Ümumittifaq televiziya filmləri festivalında I mükafat və 1980-ci ildə Berlində ADR televiziyasının diplomu verilmişdir. Filmdə əsas rolları Hacı İsmayılov, Şəfiqə Məmmədova, David Uplisaşvili, Şükufə Yusupova, Sədayə Mustafayeva, Hüseynağa Sadıqov, Fuad Poladov, Ağahüseyn Kərimov və Rafiq Əzimov ifa edirlər.

Naxçıvan Muxtar Respublikası Mədəniyyət

Nazirliyinin mətbuat xidməti

27.07.2021

 

Kitabxanaçılar üçün seminar keçirilmişdir

Naxçıvan Muxtar Respublikası Mədəniyyət Nazirliyinin sistemində fəaliyyət göstərən kitabxanaların əməkdaşları üçün “Ümumi və fərdi uçot kitablarının, kitabxana gündəliyinin işlənmə qaydaları” adlı seminarlar təşkil olunur.

Mövzu ilə bağlı ilk seminar Şahbuz Rayon MKS-nin əməkdaşları üçün keçirilib.

Naxçıvan Muxtar Respublikasının Mədəniyyət Nazirliyinin təşkilatçılığı ilə keçirilən tədbiri Nazirliyin Mədəniyyət və mədəni-irs şöbəsinin aparıcı məsləhətçisi Şəfəq Abbasova açaraq qeyd etmişdir ki, kitabxanalarda uçot və qeydiyyat işinin daha da təkmilləşdirilməsi, xidmətin keyfiyyətinin yüksəldilməsi üçün Nazirlik tərəfindən ardıcıl tədbirlər həyata keçirilir – kitabxanaçılar üçün kurslar təşkil edilir, metodiki vəsaitlər hazırlanır, seminarlar, ezamiyyələr, təcrübə məşğələləri və s. təşkil edilir. Naxçıvan Muxtar Respublikasının Mədəniyyət Nazirliyinin təşkilatçılığı ilə təşkil edilən “Ümumi və fərdi uçot kitablarının, kitabxana gündəliyinin işlənməsi qaydaları” adlı seminar da belə tədbirlərdəndir.

Vurğulanmışdır ki, seminarın əsas məqsədi kitabxanaçılara əməli və metodik köməklik göstərməkdən ibarətdir. Seminar 6 mərhələdən ibarət olacaqdır. Bugünkü seminar Şahbuz Rayon MKS-nin əməkdaşları üçün təşkil olunur.

Daha sonra M.S.Ordubadi adına Naxçıvan Muxtar Respublika Kitabxanasının direktoru Tamella Əsgərova “Ümumi və fərdi uçot kitablarının, kitabxana gündəliyinin işlənmə qaydaları” adlı çıxış etmişdir. Çap məhsulları ilk növbədə kitabxananın komplektləşdirmə şöbəsinə daxil olur. Burada kitablar qoşma sənədlə yoxlanılır. Qoşma sənədlə yoxlanıldıqdan sonra kitablar uçota alınır. Uçot işi 2 mərhələdə aparılır: Fərdi uçot kitabında və ümumi uçot kitabında. Mövzu slaydlar vasitəsilə seminar iştirakçılarına əyani izah edilmişdir.

Çıxışlardan sonra tədbir iştirakçılarının mövzu ilə bağlı sualları cavablandırılmış, kitab üzərində əyani olaraq nümunələr göstərilmişdir.

Tədbirdə Şahbuz Rayon MKS-nin 34 əməkdaşı iştirak etmişdir.

 

Naxçıvan Muxtar Respublikasının Mədəniyyət

Nazirliyinin Mətbuat Xidməti

27.07.2021

 
 

Açıq havada kino nümayişləri davam edir

İyulun 23-də Naxçıvan Dövlət Film Fondu Naxçıvan şəhərindəki “Əyləncə adası” İstirahət Parkında açıq havada “İtalyanların Rusiyada ağlasığmaz macəraları” bədii filminin nümayişini təşkil etmişdir.

İtaliyanın şəhəri Romada olan xəstəxanaların birində 92 yaşlı rus emiqrant qadın can verir. Bu zaman Olqa adlı nəvəsinə vəsiyyət edir ki, onun Leninqradda (Sankt-Peterburq) bir şirin saxlandığı qəfəsin altında 9 milyard italyan lirəsi dəyərində xəzinəsi var. Bu vəsiyyəti onun nəvəsi ilə yanaşı, həkimlər Antonio, Cüzeppe, habelə kapitan Andrey Vasilyev və Rozario Aqro eşidirlər və Leninqrada xəzinənin ardınca gedirlər. Beləliklə, italyanların Rusiyada ağlasığmaz macəraları başlayır...

SSRİ ilə İtaliyanın birgə istehsalı olan və 1973-cü ildə ekranlaşdırılan filmin rejissoru Eldar Ryazanov, ssenari müəllifləri isə Emil Braqinski, Eldar Ryazanov, Franko Kastellano və Cüzeppe Pipolodur. Prodüserləri Dino və Luici De Laurentislərin olduğu filmdə baş rolları Andrey Mironov, Antoniya Santilli, Aliqyero Noskeze, Ninetto Davoli və b. ifa edirlər.

Film SSRİ-də ekranlara çıxdığı ilk ildə 50 milyon tamaşaçı tərəfindən izlənmişdir.

 

Naxçıvan Muxtar Respublikası Mədəniyyət

Nazirliyinin mətbuat xidməti

23.07.2021

 
 

Görkəmli ədibin ev muzeyinin yaradılmasının 40 illiyi qeyd edilmişdir

İyulun 17-də Naxçıvan Muxtar Respublikası Mədəniyyət Nazirliyinin və AMEA Naxçıvan Bölməsinin təşkilatçılığı ilə görkəmli ədib Hüseyn Cavidin Naxçıvan şəhərindəki Ev Muzeyi və Xatirə Kompleksində ev muzeyinin yaradılmasının 40 illiyinə həsr olunmuş tədbir keçirilmişdir.

Tədbir iştirakçıları əvvəlcə şair-dramaturqun və onun ailə üzvlərinin uyuduğu məqbərəni ziyarət etmiş və buraya gül qoymuşlar. Dahi şairin Naxçıvan şəhərindəki ev-muzeyində keçirilən tədbirdə giriş sözü ilə çıxış edən Naxçıvan Muxtar Respublikasının Mədəniyyət naziri Natəvan Qədimova böyük söz ustadının bəşəri ruhlu, həmişəyaşar yaradıcılığından, Cavid şəxsiyyətinə və irsinə dövlət qayğısından söhbət açıb.

Vurğulanıb ki, ötən əsrin 70-ci illərindən başlayaraq Cavid irsi ölkəmizdə geniş tədqiq olunmağa başlamış, əsərləri kütləvi tirajla nəşr olunmuş, pyesləri teatrlarda səhnəyə qoyulmuş, xatirəsini əbədiləşdirmək üçün mühüm işlər həyata keçirilmişdir. Belə tədbirlərdən biri də xalqımızın ümummilli lideri Heydər Əliyevin təşəbbüsü və rəhbərliyi ilə 1981-ci il iyul ayının 21-də “Hüseyn Cavidin 100 illiyi haqqında” qəbul olunan qərardan sonra böyük şair və dramaturqun Naxçıvan şəhərində bir zamanlar uşaqlıq və gənclik illərini yaşadığı evdə ev muzeyinin yaradılması olmuşdur. Hüseyn Cavidin Naxçıvan şəhərindəki Ev Muzeyi və Xatirə Kompleksi ölkəmizdə sənətə və sənətkara göstərilən qiymətin ən gözəl nümunəsidir.

Qeyd olunub ki, doğma diyarımızda da Cavid irsinin yaşadılması, öyrənilməsi və təbliğ olunması xüsusi diqqətdə saxlanılır. Naxçıvan Muxtar Respublikası Ali Məclisi Sədrinin ədibin yubileyləri ilə bağlı imzaladığı Sərəncamlar və təsdiq etdiyi Tədbirlər Planına əsasən, qədim diyarımızda da böyük sənətkarın yubiley tədbirləri yüksək səviyyədə təşkil olunmuş, elmi konfranslar və simpoziumlar keçirilmiş, Cəlil Məmmədquluzadə adına Naxçıvan Dövlət Musiqili Dram Teatrında Hüseyn Cavidin “Şeyx Sənan”, “Xəyyam” və “İblis” əsərləri tamaşaya hazırlanmışdır. Şair-dramaturqun ev muzeyi və xatirə kompleksində əsaslı təmir-bərpa işlərinin aparılması, həmçinin Naxçıvan Muxtar Respublikası Ali Məclisi Sədrinin 2007-ci il 15 may tarixli Sərəncamına əsasən hər il oktyabrın 24-nün - ədibin anadan olduğu günün qədim diyarımızda “Hüseyn Cavid Poeziya Günü” kimi qeyd olunması böyük sənətkara dərin sayğının və ədibin ümumbəşəri yaradıcılığına məhəbbətin bariz ifadəsidir. Naxçıvan Muxtar Respublikası Ali Məclisi Sədrinin 2017-ci il 28 avqust tarixli Sərəncamı ilə təsdiq olunmuş “Oxunması zəruri olan kitabların siyahısı”na Hüseyn Cavidin “Azər” poemasının daxil edilməsi isə ədibin zəngin irsinin gənc nəslə çatdırılması sahəsində atılan mühüm addım kimi dəyərləndirilir. 2019-cu ildə Naxçıvan Muxtar Respublikası Ali Məclisi Sədrinin Sərəncamına əsasən keçirilən dahi ədibin oğlu Ərtoğrol Cavidin 100 illik yubiley tədbirləri də Cavid irsinə göstərilən qayğının bariz nümunəsidir.

Ardını oxu...

 
 

Açıq havada kino nümayişləri davam edir

16 iyul 2021-ci il tarixdə Naxçıvan Dövlət Film Fondu “Əyləncə adası” İstirahət Parkında açıq havada “Yaşıl kitab” bədii filminin nümayişini təşkil etmişdir.

Filmin süjeti real hadisələrə əsaslanır. Toni mühafizəçi işləyən orta yaşlı kişidir. Hamı onu “Çərənçi” adlandırır. Çünki istənilən mövzuda boşboğazlıq etməkdə mahirdir. Elə ki, danışmağa başladı, “ağzını bağlamaq olmur”. Bundan başqa burnunu başqalarının işlərinə soxur, hamıya məsləhətlər verir. Günlərin bir günü köhnə tanışı ona zəng edərək, elmlər doktoru olan bir tanınmış musiqiçinin özünə qastrol səfəri üçün sürücü axtardığını xəbər verir. Tezliklə qaradərili musiqiçi Şerli ilə tanış olur. Onları qarşıda uzun və əyləncə dolu turne gözləyir. Bu səyahət hər ikisinin həyatını dəyişəcək...

Rejissoru Piter Farelli olan film 2018-ci ildə ABŞ-da “Universal Pictures” studiyasında istehsal edilmişdir. Baş rolları Viqo Mortensen, Maherşala Əli, Linda Kardellini və b. ifa edirlər.

“Yaşıl kitab” filmi ekranlara çıxdıqdan qısa müddət sonra bir sıra – “Oskar”, “Qızıl qlobus”, “BAFTA” və Amerika Kino İncəsənəti İnstitutunun “İlin ən yaxşı filmi” mükafatlarına layiq görülmüşdür. 23 milyon dollar büdcə ilə çəkilən bu film yayımlardan 328,6 milyon dollar gəlir gətirmişdir.

 

Naxçıvan Muxtar Respublikasının Mədəniyyət

Nazirliyinin mətbuat xidməti

17.07.2021

 
 

Səhifə 1 > 284-dən

Joomla 1.5